Знаете како...? Мислам дека музиката одамна се оддалечи од луѓето и стана предвидлива баналност. Bowie купува планини, Бугарскиот Идол е најпопуларното show, етно музиката добро се наплатува, Jagger ја фарба косата... ова време станува се попсиходелично. Големите контракултурни промени ни од далеку не се на повидок, тоа е јасно, но "малите" социјални мрежи можат да бидат следното големо нешто.

photo © cover

Луѓето се спојуваат по својот афинитет, рециклираат, истражуваат и создаваат свој простор за живеење. Во случајот на Словенците Coma Stereo опседнатоста со science fiction книгите и филмовите 2004. година прерасна во музика. Дебитираат во 2007. со синглот "I can programme myself whenever I want to", а истата година го издаваат и долгосвиречкото издание "Binary Endings". По маратонското промовирање на материјалот (во октомври 2008. можност да ги види имаше и скопската публика), во април годинава ја реализираат Transgalaktika, без двоумење нивниот досегашен креативен хајлајт.
Мариборскиот квартет - Tomaž, Domen, Sašo и Marko не кокетира со трендовите, тоа е за почит. Дури напротив, копаат по музичките епохи, цитираат наизглед веќе чуени лајтмотиви но создаваат приемчив амалгам од electropsycho влијанија. Сите 8 песни се работени со грижлив сенс и токму со онаа поднослива лежерност која сакате да ја слушнете, ни помалку ни повеќе. Аналогните синтисајзери, со лежерноста на раните изданија на Ralf и Florian или можеби како некоја загубена територија на Tangerine Dream во La resistance парадно го отвараат албумот и ја најавуваат трипозната приказна која следува.

photo © www.comastereo.com

Мудро загледани во златната ера на "бек ту д рутс психоделијата" Coma Stereo се поигруваат со архаичноста на истата на еден питом начин, со разиграна репетитивност, на моменти молска, на моменти дурска. За среќа, не постои песна која на албумот ги надвладува останатите (иако за сингл и спот е избрана Sevastopol), Transgalaktika нуди инспиративно sci-fi талкање од меланхоличен карактер во еден здив. Иако изгледа дека е излезена од лабораториите на dr. Hofmann, Transgalaktika е сепак приземен албум, со интригантна и автентична соничност. И како за крај, ако можам да си ја дозволам завршната "дијагноза": како и повеќето нови бендови и Coma Stero боледува од англосаксонскиот вирус... некако ми се чини дека се ова би звучело поубедливо на нивниот мајчин јазик.
Ова не е албум од и за Trainspotting генерацијата, Transgalaktika е отворено и современо четиво за пост современото време.

Оценка: 8/10

Артист: Coma Stereo
Албум: Transgalaktika
Датум на објава: 14 април 2009
Продуцент: Hrvoje Nikšić
Издавач: Solar Pulse Music
Времетраење: 51:11

Tracklist:
1. La resistance
2. Iskra
3. Android transmissions
4. Jasmin Starwars
5. Sevastopol
6. Sea of tranquility
7. Transgalaktika
8. Her daddy didn't love her, but the acid did

Саша Павловиќ