Во периодот од 9ти -23ти Јули 2009, во Охрид, ќе се одржи музичка работилница насловена - технологијата навлегува во традицијата. За таа цел, Јавна соба, со соработка со Zoey Foundation for Arts and Culture распишуваат отворен повик за композитори. Оттаму велат: „Повикот е отворен за композитори кои што се заинтересирани да научат повеќе за електронската музика во комбинација со акустични инструменти или да го продлабочат знаењето кое веќе го имаат. Треба да се спремни за нови предизвици, односно да се заинтересирани да експериментираат со технологија, со електроника во живо, да сакаат да соработуваат со музичари од друга култура, да се љубопитни и отворени кон нови предизвици во музиката. Композиторите пред се мора да имаат базично познавање на работа со компјутер.“

photo © гугл

Предавачи на работилницата ќе бидат професори од Факултетот за музичка технологија од Утрехт, Холандија. Оние кои ќе бидат избрани да учествуваат ќе можат да одберат да работат со еден или повеќе од овие професори. Главна тема на работилницата ќе биде електроника во живо (real-time). Целта на работилницата е запознавање на слушателите со популарните концепти на синтеза и обработка на звукот во дигиталниот домен.
Ова задоволство чини 100 евра, а во цената се вклучени предавањата, сместувањето, храната и евентуалните трошоци за превоз низ Охрид.
Кој сака да се пријави, може тоа да го стори со праќање на кратка биографија(максимум 15 реда), во која ќе биде вклучена музичката позадина и едукација и кратко мотивационо писмо на адресата: avelinovski[at]publicroom.org