Веројатно ќе се согласиме дека еден од поголемите проблеми со кои се соочува(ше?) главниот град е тоа што има далеку помал број и интензитет на културни случувања во споредба со престолнините во регионот. Но, кога ќе се спореди со другите градови во земјава, Скопје е културна Мека, алфа и омега на културното живеење... Во градовите во внатрешноста (се надевам дека грешам и дека има исклучоци), владее неподнослива културна суша. За среќа, од време на време, ќе се најде некој кој ќе се обиде за момент да ја изгасне жедта на оние, директно погодените. Еве го соопштението што ни пристигна, баш од едни такви луѓе:

Центарот за Изведувачки Уметности- МУЛТИМЕДИА од Скопје во соработка со Музеј и Завод, Штип, Општина Штип и Совет на град Штип, Фондација за развој на локалната средина, ДСМУ Сергеј Михајлов и НВО Заедно, во периодот од 26-ти до 29-ти април, 2007 год. во Штип организираат Фестивал на Урбани Уметности „АРТ ГЕНЕРАТОР“ . Проектот финансиски е поддржан од Central European initiative координирано преку Министерство за Култура на Република Македонија, Про-Хелвеција, Скопје, Агенција за млади и спорт (програма Сите различни-Сите еднакви).

photo © Постер

“АРТ ГЕНЕРАТОР 2007” е место за дијалог на заедниците од регионот на Балканот, оспособувајќи ги луѓето да ја употребат уметноста како медиум на соочување, комуникација и влијание врз општествените и социјалните прашања. За време на 4 дена (26-29.04.2007) овој фестивал ќе престави разновидни уметнички содржини кои вклучуваат филм, перформанс, музика, отворени и јавни инсталации, работилници и предавања кои го обработуваат прашањето на регионалната мобилност.
Годинешната тема на Фестивалот е: “Манифест на тркала: Хијазма на Уметничката Мобилност”. Оваа е референцијална точка на секоја активност. Темата ја поттикнува желбата и страста на уметниците и младите за патување и културен дијалог, што всушност преставува и агенда на Балканот поради политичката, економската и социјалната изолација на земјите. Уметничката перцепција и восприемање на концептот на мобилноста ќе биде водечкиот елемент за градење на „Манифестот на тркала“, предвестувајќи ги крстосниците каде сите се среќаваат и разменуваат.
Програмата на „АРТ ГЕНЕРАТОР“ обединува видео програма која се состои со јавна презентација на видео продукцијата на девет земји: Словенија, Босна и Херцеговина, Хрватска, Романија, Полска, Албанија, Турција, Бугарија и Македонија,јавна перформанс програма во реализација на театарската трупа: Породица Бистрих Потока, Србија, музичка програма во концертна изведба на Алек Пејовски трио,визуелна инсталација на Џорџе Јовановиќ и две интерактивни работилници „Stop-motion анимација 101“ и „ Стикер Арт“ работилница. Сите настани ќе се изведат на 3 различни културни точки во Штип, видео програмата и инсталацијата во Безистен, перформансот на Градскиот плоштад и музичката програма во ДСМУ Сергеј Михајлов (салата за јавен час).

photo © Арт Генератор 2005

Фестивалот е замислен како јавен настан кој со својата содржина ќе ги анимира пред сé младите во Штип и позитивно ќе влијае на квалитетот на културно живеење во град Штип. Оваа активна и организирана партиципација на младите ќе допринесе во градењето на локалната културна политика и ќе ги оживее местата во Штип, есенцијални за неговото културно живеење. Воедно оваа програма ќе биде основата за иден развој на Младинска Уметничка Платформа која пред се ќе ја поттикне и вообличи регионалната мобилност помеѓу уметниците.

photo © Арт Генератор 2005

“Манифестот на тркала” и АРТ ГЕНЕРАТОР 2007 ги поканува уметниците и посетителите да бидат истражувачи кои ќе ги бараат врските помеѓу скриените реалности, непознатите приказни и слики, непотполните информации и непотполни мапи на територии одбележани со загуба, насилство, жалење, социјална борба и отпор. Истражувачите можеби ќе најдат доказ на (не)видливи мрежи на солидарност, бегство и отпор создадени од различни групи на луѓе чии животи, градови и земји се видливо сменети од силите на неодамнешните промени во регионот и глобализацијата.

ПРОГРАМА