 photo © cover |
Композициите на овој уникатен светски проект, се на Тони Китановски. Композиции извлечени од секојдневието на еден џез музичар. Музичар кој го печеше занаетот на бостонскиот Berklee College, кој настапувал со светски познати имиња, се враќа на традицијата во едно маало каде што пак музицирањето се учи дома, од тато, дедо, на свадби, крштевки, сунети. Самоуки музичари, кој по утринското кафе прво се фаќаат за дувачкиот инструмент, па се друго понатака. Замислете го вие тоа, колку е лесна или тешка, оваа соработка и овој заеднички проект. Дали тие свират по ноти? Како ја пишал Тони музиката за ова дело? Овие се прашањата кои мене ми поминуваат низ глава, слушајќи ги лудите мешавини на фанк, реге, чочеци, балкански фолклор, самба и што уште не.
 photo © N.A. |
Првата композиција Тони ја посветува на нему омилениот jazz тапанар Ed Blackwell. Мене омилена нумера, која почнува со едно долго хмммммммммММММММ преминува во фанки-џезерски прашања одговори на трубите vs. тубите, а Тони со својата гитара не дозволува тоа да излезе од зацртаните маргини. Александар Секуловски пак во текот на целиот албум ги спојува гитарите и звуците од дувачките инструменти, со што на албумот му дава некој New Orleans-ки шмек. Меѓудругите, се наоѓаат и неколку обработени традиционални песни како Tetovska, Turkish Cocek или Christening Dance(источна Македонија) каде што како гости се појавуваат и Изет Кизил на перкусии и Хустреф Саид на канон. Фантастична приказна со преубаво соло на Асан е онаа за Шехерезада, фјучринг фрики вокал на Руиж. Gnossienne No. 1 меѓу џезерите многу добро познато музичко дело напишано за пијано од страна на Eric Satie магично се претопува во композиција, која како никогаш да не била напишана за пијано. За истата оваа нумера постои и чочек верзија, која што заедно со Mr. Neat се песните кои ве дигаат од столчето/креветот и ве тераат да мрдате со колковите сенкир Шакира сте.
Тони Китановски со овој проект на едноставен начин ја спојува Топаана со New Orleans. Албумот добива факин 9 чочеци од 10. Да се надеваме дека наскоро ќе биде достапен и во Македонија.
Музичари:
Toni Kitanovski, гитара
Aleksandar Sekulovski, џез тапани
Cerkez Rashid, труба
Asan Rashid, труба
Ali Rashid, труба
Sefedin Rashid, туба
Hamid Rashid, туба
Mamer Zejnelov, туба
Vilhen Memedov, туба
Sefer Ismailov, традиционален тапан
Гости:
Izzet Kizil, перкусии на "Christening Dance"
Lynette Gittens, нарекувана Angel Vocals, вокали на "Togo" Rujiz Kadrieva, вокали на "Seherezad", нарација на "New Orleans", "Cherkez Babo" и "Christening Dance"
Hustref Said, канон на "Seherezad" и "Christening Dance"
Olivier Samouillan, виола на "Togo"
